Neytendasamtökin fá margar fyrirspurnir vegna gjafabréfa og snúast kvartanir gjarnan um of stuttan gildistíma þeirra. Þykir fólki súrt í broti að geta ekki nýtt gjafakort vegna takmarkana sem seljandi setur en Neytendasamtökin hafa fengið fyrirspurnir vegna gjafabréfa með gildistíma allt niður í 3 mánuði.

Gilda engar reglur?
Í leiðbeinandi reglum sem iðnaðar- og viðskiptaráðuneytið gaf út fyrir nokkrum árum er miðað við að gjafabréf gildi í 4 ár. Því miður er langt í frá að allir seljendur fylgi þessum reglum. Sé ekkert tekið fram á gjafabréfi er miðað við 4 ár sem er almennur fyrningarfrestur. Hins vegar er heimilt að semja um styttri eða lengri fyrningarfrest og algengast er að seljandi setji einhvern gildistíma á gjafabréfið.

Snyrti- og nuddstofur áberandi
Margar kvartanir snúast um stuttan gildistíma á gjafabréfum frá snyrti- og nuddstofum. Margir fá vænan skammt af gjafabréfum á stórafmælum og þá getur þurft að hafa hraðar hendur ef nýta á öll kortin áður en þau renna út.
Neytendasamtökin ákváðu að athuga málið nánar og höfðu samband við 28 snyrtistofur og spurðust fyrir um gildistímann. Í flestum tilfellum, eða 13, gilda gjafabréf í eitt ár. 9 stofur hafa 6 mánaða gildistíma, ein er með 2 ára gildistíma og hjá 5 stofum eru engin skilyrði um gildistíma.

Semja um rýmri gildistíma eða snúa sér annað
Það vekur athygli hversu margar snyrtistofur eru einungis með 6 mánaða gildistíma. Það er of stuttur gildistími að mati Neytendasamtakanna. Samtökin hvetja seljendur til að rýmka gildistímann á gjafabréfum enda er það sjálfsögð þjónusta við viðskiptavini. Jafnframt hvetja samtökin neytendur til að kynna sér gildistímann áður en gjafakort er keypt.

Útrunnið gjafabréf gildir samt
Margar snyrtistofur tóku fram að þótt ákveðinn gildistími væri á gjafabréfinu væri það meira til viðmiðunar. Þannig væri ekki tekið hart á því þótt gjafabréfið væri útrunnið
Það er því um að gera fyrir fólk að hafa samband við seljanda og athuga hvort gjafabréfið sé í raun útrunnið áður en því er hent.