Ferðalög-alferðir (pakkaferðir)

Skýringar Neytendasamtakanna við lögin

Stikkorð um alferðir

Alferð = Tvennt af eftirfarandi: gistingu, flutningi eða önnur þjónusta sem tekur til verulegs hluta ferðar þegar það er selt saman á heildarverði og þjónustan tekur lengri tíma en 24 klst. eða í henni felst gisting.

Í bæklingum og auglýsingum um alferðir skal tilgreina verð og allar upplýsingar um ferðina á greinargóðan og nákvæman hátt. Upplýsingar í bæklingi eru bindandi fyrir ferðasala nema farkaupa hafi verið tilkynnt um breytingar fyrir samningsgerð, samkomulag hafi orðið um breytingar eða verðbreytingar séu heimilar (skv. 7. gr. afl.).

Ef farkaupi afpantar ferð getur ferðasali krafist þóknunar sem ákveðin er m.t.t. þess hvenær afpantað er og hvers eðlis ferðin er. Áður en samningur er gerður skal farkaupa tilkynnt um hvaða skilmálar gilda um afpantanir.

Farkaupi hefur rétt til að afpanta ferð vegna stríðsaðgerða, borgarastyrjaldar, lífshættulegra smitsjúkdóma eða annars sem hefur afgerandi áhrif á framkvæmd alferðar á áfangastað eða nálægt honum þegar amk 14 dagar eða færri eru til brottfarar. Full endurgreiðsla – gildir þó ekki ef farkaupi hefði mátt sjá þetta fyrir.

Áður en samningur um ferð er gerður skal veita farkaupa upplýsingar um tryggingar geti farkaupi ekki tekið þátt í ferð.

Þegar farkaupi getur ekki nýtt sér alferð getur hann framselt bókun sína til aðila sem fullnægir þátttökuskilyrðum. Ferðasali skal fá vitneskju um þetta með sanngjörnum fyrirvara áður en ferðin hefst. Farkaupi/framsalshafi eru ábyrgir fyrir aukakostnaði vegna þessa.

Verð það sem sett er fram í samningi skal haldast óbreytt nema því aðeins að þar sé skýrt tekið fram að verð geti hækkað eða lækkað og nákvæmlega sé tilgreint hvernig reiknað skuli út breytt verð. Aðeins er heimilt að breyta: a) Flutningskostnaði, þ.á.m. eldsneytiskostnaði. b) Álögum, sköttum eða sérgreiðslum fyrir tiltekna þjónustu, s.s. lendingargjöldum. c) Genginu sem á við um ferðina. ATH. Síðustu 20 dagana fyrir brottför má ekki hækka verð!

Ferðasali á að tilkynna um breytingar eins fljótt og unnt er. Ef breyting er veruleg má farkaupi rifta eða gera viðbótarsamning og ætli hann að gera slíkt verður hann að tilkynna ferðasala um það eins fljótt og unnt er. Ef farkaupi riftir af þessari ástæðu á hann rétt á fullri endurgreiðslu eða því að taka aðra ferð í staðinn. Ef ferðin sem farin er í staðin er ódýrari á farkaupi rétt á endurgreiðslu á mismuninum en ef hún er dýrari verður hann að greiða mismuninn.

Verði farkaupi fyrir tjóni vegna verulegra breytinga á hann rétt á skaðabótum nema ef ferðinni var aflýst vegna þess að lágmarksfjöldi þátttakenda var ekki nægur (og vitað var um það skilyrði) eða ferðinni er aflýst eða breytt vegna ófyrirsjáanlegra aðstæðna sem sé sem ber þær fyrir sig fær engu ráðið um og hefði ekki getað komið í veg fyrir afleiðingar þeirra.

Ef ferð fullnægir ekki ákvæðum samnings getur farkaupi krafist þess að ráðin sé bót á því nema að það hafi í för með sér óeðlilegan kostnað eða veruleg óþægindi fyrir ferðasala. Ef ekki er hægt að bæta á farkaupi rétt á verðlækkun sem jafngildir mismuninum á þeirri þjónustu sem um var samið og þeirr sem veitt var. Ef um verulegar vanefndir er að ræða getur farkaupi rift samningnum nema ferðasali ráði bót á. Ef flutningur er hluti ferðar sem farkaupi kýs að rifta getur hann krafist þess að vera fluttur sér að kostnaðarlausu til þess staðar sem alferð hófst eða á annan stað sem samið hefur verið um.

Farkaupi verður að tilkynna ferðasala um allar vanefndir eins fljótt og kostur er. Þessi skylda verður að koma skýrt fram í samningi.

Farkaupa ber að hlýða fyrirmælum fararstjóra og starfsmanna annarra þjónustuaðila. Vanefni farkaupi þetta verulega má útiloka hann frá frekari þátttöku í viðkomandi ferð eða koma í veg fyrir að hann hefji hana og krefja hann um fullt verð fyrir ferðina. Ef ferðin er hafin verður hann sjálfur að standa straum af viðbótarkostnaði sem leiðir af útilokun hans frá ferðinni.

NEYTENDASAMTÖKIN frjáls félagasamtök