Þing 2018

Þing NS verður haldið í Akóges salnum, Lágmúla 4, laugardaginn 27. október. Hlé er gert á þinginu meðan kosning til stjórnar og formanns stendur yfir. Fundi er fram haldið á sunnudeginum 28. október í höfuðstöðvum NS að Hverfisgötu 105. Þingið verður jafnframt rafrænt til að auka möguleika fólks á þátttöku óháð fjölskylduaðstæðum, heilsu og búsetu.  

Skráðu þig á þingið
Samkvæmt lögum samtakanna þurfa félagsmenn að skrá sig á þingið eigi síðar en á miðnætti þann 20. október. Þeir einir geta tekið þátt í þingi samtakanna, og þar með kosningum til stjórnar og formanns, sem eru félagsmenn og eru skuldlausir við samtökin viku fyrir þingið. Skráning á þingið fer fram á ns.is. Einnig er hægt að hringja á skrifstofuna í síma 545 1200 á opnunartíma.
Ath! Greiðsla félagsgjalda verður ekki möguleg á þinginu enda skulu þingfulltrúar vera skuldlausir viku fyrir þing.

 

Rafrænt þing
Umræðum á þinginu verður streymt á netinu. Einnig verður unnt að koma fram með innlegg og athugasemdir sem lesnar verða upp á þinginu eftir því sem dagskráin leyfir. Þingfulltrúar munu fá sendan tölvupóst með nánari upplýsingum um tilhögun rafræns þings þegar nær dregur.

 

Rafræn kosning – hvernig á að kjósa?
Félagsmenn sem hafa skráð þátttöku sína á þinginu eru á kjörskrá til rafrænnar kosningar formanns og stjórnar. Til að kjósa fara félagsmenn á heimasíðu NS og smella þar á tengil til að opna rafrænu kosninguna.  Eftir að smellt er á tengilinn eru félagsmenn auðkenndir með annaðhvort Íslykli eða rafrænum skilríkjum áður en kjörseðill er fylltur út og atkvæði skilað í rafrænan kjörkassa. Sérhver kjósandi getur kosið eins oft og hann vill, en eingöngu síðasta atkvæðið er gilt. Hvorki verður fylgst með mætingu á þingið né verður þátttakendalisti birtur. Kjörskrá verður eytt að loknum kosningum.

Gert er ráð fyrir að kosningar hefjist um kl. 14:00 þann 27. október, mögulega síðar ef tafir verða á dagskrá. Kosningar munu standa til kl 12:00 daginn eftir, þann 28. október.

 

Upplýsingar um starf NS 2016-2018
Ekki verður gefin út sérstök þingskýrsla eins og verið hefur. Þess í stað er ýmsar upplýsingar um starf samtakanna síðustu tvö árin að finna í Neytendablaðinu. Ítarefni, svo sem ársreikninga samtakanna og ársskýrslur um Neytendaaðstoðina, Leigjendaaðstoðina og Evrópsku neytendaaðstoðina, er að finna hér á heimasíðu samtakanna.

 

Fjölmörg framboð
Mikil eftirspurn er eftir formannsembætti Neytendasamtakanna sem og setu í stjórn. Borist hafa sex framboð til formanns og 32 framboð til stjórnar. Formaður og ný 12 manna stjórn verður kosin á þinginu.